Еўрастат прадставіў свежую статыстыку па інфляцыі ў краінах Еўрасаюза ў лютым гэтага года. Праект Thinktanks паглядзеў, як выглядае Беларусь на іх фоне.
Гадавы ўзровень інфляцыі ва ўсім Еўрапейскім саюзе ў лютым гэтага года склаў 2,7%, вынікае са звестак Еўрастата.
Пры гэтым у еўразоне, куды ўваходзяць 20 з 27 дзяржаваў ЕС, у лютым гадавая інфляцыя склала 2,3% (у студзені было 2,5%). Найбольшы ўклад у інфляцыю ў еўразоне ўнеслі паслугі (+1,66 працэнтнага пункта).
Самыя высокія значэнні гадавой інфляцыі сярод краін ЕС былі зафіксаваныя ў Венгрыі (5,7%), якая лічыцца дружалюбнай да афіцыйнага Мінска. Следам па падаражэнні тавараў і паслуг ідуць Румынія (5,2%) і Эстонія (5,1%). Для параўнання: у Беларусі ў мінулым месяцы цэны выраслі на 5,6% у гадавым выражэнні.
Самыя нізкія паказчыкі па інфляцыі ў ЕС былі адзначаныя ў Францыі (0,9%), Ірландыі (1,4%) і Фінляндыі (1,5%).
У параўнанні са студзенем 2025-га гадавая інфляцыя ў лютым знізілася ў чатырнаццаці дзяржавах ЕС, а вырасла — у сямі.
Як у Беларусі штучна стрымліваюць цэны і чым гэта пагражае
На 2025 год чыноўнікі плануюць утрымліваць інфляцыю ў Беларусі на ўзроўні да 5%. Нацбанк асцерагаецца, што калі беларусы і далей будуць актыўна браць крэдыты, то гэта можа падарваць фінансавую стабільнасць і паскорыць інфляцыю.
Утрымліваць інфляцыю ў межах адназначнай лічбы шмат у чым удаецца за кошт жорсткага цэнавага дзяржрэгулявання, якое ўвялі ў кастрычніку 2022 года. Раней эксперты гэтага банка прагназавалі, што беларускія чыноўнікі пойдуць на паслабленне цэнавага рэгулявання для таго, каб палепшыць фінансавы стан прадпрыемстваў праз «назапашаныя цэнавыя выдаткі».
Чытайце таксама
