У 2022 годзе ў Беларусі вырасла колькасць спробаў ашуканцаў скрасці грошы з картак. Пра гэта гаворыцца ў справаздачы Банкаўскага працэсінгавага цэнтра.
Летась у Беларусі выявілі на 14% больш выпадкаў махлярства з банкаўскімі карткамі. Пры гэтым агульная сума грошай такіх ашуканскіх аперацый зменшылася на 15%, а сярэдняя сума кожнай з іх склала каля 42 даляраў.
«Многія схемы махлярства 2022 года не сталі новымі, пры гэтым яны перайначыліся і падладзіліся пад цяперашнюю сітуацыю ў свеце, а новыя тэхналогіі пацягнулі за сабой і новыя ідэі махляроў, накіраваныя на крадзеж грашовых сродкаў», — адзначаецца ў аналізе Банкаўскага працэсінгавага цэнтра.
У 2022 годзе ў 2,7 разу вырасла колькасць спробаў скрасці грошы з выкарыстаннем падробленых картак. У 1,2 разу больш стала выпадкаў махлярства праз выманьванне ў людзей звестак падманным спосабам.
Вынікі аналізу не ахопліваюць усю тэрыторыю Беларусі, бо не ўсе банкі падключаныя да Банкаўскага працэсінгавага цэнтра. Аднак, як сцвярджаецца ў матэрыяле, яны могуць сведчыць пра асноўныя тэндэнцыі.
Часцей за ўсё ахвярамі ашуканцаў станавіліся жанчыны — у 57% выпадкаў. Пятая частка ўсіх, хто сутыкнуўся з такімі злачынствамі, жыла ў Мінску. Больш за 65% пацярпелых — гэта людзі ва ўзросце 18−44 гадоў.
У два разы павялічылася колькасць злачынстваў, звязаных з сістэмай эквайрынгу (безнаяўных плацяжоў па картках або па бескантактнай сістэме праз POS-тэрміналы). Палова такіх злачынстваў датычыла аплаты без карткі. Траціна — гэта аперацыі па выкрадзеных картках. Пры гэтым колькасць паспяховых злачынстваў такога віду вырасла ў 1,8 разу, а сярэдняя сума адной аперацыі склала 84 даляры.
Чвэрць такіх аперацый ашуканцы праводзілі ў харчовых крамах, 16% — у барах і рэстаранах.
Летась колькасць ашуканскіх аперацый без выкарыстання карткі вырасла ў два разы.
